Napaka Fair!

hindi ba't madalas ay malawak ang utak ng mga tao. madalas din naman ay makitid. kahit ang ilan ay nasa tamang edad na at marami ng napagdaanan sa buhay, ang ilan sa atin ay hindi pa rin matanggap na ang buhay ay sadyang madaya. napaka unfair ika nga. pero alam na natin 'yon diba? bakit pag tayo ang dinaya ay inis na inis pa rin tayo? kapag tayo ang pinagkuhanan ay maghihinagpis pa rin tayo at sasabihing,

"napaka unfair talaga ng buhay!! bakit ako pa? bakit sakin pa nangyari 'to?"

pero ang totoo naman ay ang LAHAT sa atin ay nakakaranas ng mga bagay na hindi natin kagustuhang mangyari. lahat tayo masasaktan, maiiwan, at ipagkakaila ng tadhana. kahit mayaman, mahirap, o pangkaraniwang tao ka, dadaanan ka ng bagyo na may kasamang kulog at kidlat.

may mga taong gustong yumaman. pag yumaman na daw sila ay wala na silang problema. ang hindi natin alam ay ang may ibang mayayamang tao na tatalikuran ang kayamanan nila gumaling lang ang may sakit na mahal sa buhay, o bumalik lang ang nawawalang anak, o makasama lang nila ang tunay nilang mahal.

may ibang mga mahihirap naman na buo ang pamilya at kahit naghihikahos sa hirap ay kumpleto pa din sila at nagtutulungan. siguro ito ang hanap ng ibang mga mayayaman.

at yung mga pangkaraniwan ay dumadaan din sa mga mapapapait na pagsubok.

may naiiwan, nawawalan, nasusunugan, nababagsakan ng negosyo, tinatangayan ng bagyo, bumabagsak sa exam, nagkakasakit, nababaon sa utang, nakukulong, at nasasawi sa pag-ibig, at kung anu anu pang pagsubok ng buhay. meron din naman na nakakaraos sa hirap, nananalo sa lotto, lumalakas ang negosyo, binibiyayaan ng anak, nakakahanap ng tunay na pag-ibig. nakakapagpatayo ng sariling bahay, nakakapunta sa ibang bansa na nais nila, at kung anu anu pang magagandang pangyayari.

nakakalimutan natin na hindi lana tayo ang pwedeng suwertihin at malasin. lahat pwede. kapag sinusuwerte tayo huwag natin ipagdamot kasi may mga tao na habang ika'y nagdiriwang, sila nama'y namimighati. naniniwala ako na mas bibiyayaan tayo kapag ipinapamahagi natin ito sa kapwa natin. kapag minamalas naman ay huwag mawawalan ng pag-asa at huwag daing ng daing. bumangon ka at hanapin ang suwerte mo.

hindi ko ikakailang dumadaing din ako pag minamalas at feeling ko ay galit sakin ang mundo. natural lang siguro sa atin 'yon. huwag lang siguro natin kalimutan na lahat tayo ay pinagbibigyan. lahat din ay pinagkakaitan.